Please Update Your Browser.

दुवईको दुर्घटनामा ज्यान गुमाउने नेपालीको संख्या तीन पुग्यो

काठमाडौं, १० जेठ । दुवईमा मंगलबार बिहान भएको सवारी दुर्घटनामा ज्यान गुमाउने नेपालीको संख्या तीन पुगेको छ । 

मंगलबार भएको दुर्घटनामा नेपाली सहित सात जना प्रवासी कामदारको घटनास्थलमै ज्यान गएको थियो । ज्यान गुमाउने सात मध्ये २ जना नेपाली सहित दुई जना भारती, २ जना पाकिस्तानी र एक बंगालादेशी नागरिक हुन । दुर्घटनामा परेर गम्भिर घाइते भएका मध्ये अर्का एक जना नेपालीको बुधवार बिहान उपचारको क्रममा ज्यान गएको हो । 

मंगलबार ज्यान गुमाउने नेपालीहरुमा बासुदेब लामिछाने र कृष्ण भुसाल छन् । उनीहरुको ठेगाना भने खुलेको छैन । बुधबार ज्यान गुमाएका एक नेपालीको पहिचान नखुलेको नेपाली दूतावास आबुधाबीले जनाएको छ । 

दुवईको मोहम्मद बिन जायद र शेख जायद सडकको बिचमा पर्ने अल यलायिस स्ट्रिटमा भएको दुर्घटनामा ८ जनाको ज्यान गएको थियो । ट्रान्सगार्ड सेक्युरिटी कम्पनी अन्तर्गत होटल एटलान्टिसमा सेक्युरिटी गार्डको रुपमा कार्यरत उनीहरु सोमबार रातीको ड्युटी सकेर क्याम्पमा फर्कंदा दुर्घटनामा परेका थिए । 

कम्पनीकै कामदार बोक्ने बसको टायर बिच बाटोमै पड्किएको थियो । त्यसपछि अनियन्त्रित भएको बस डिभाइडर नाघेर विपरित दिसाबाट आएको ट्रकसँग ठोक्किएको थियो । बसमा ४१ जना कामदार सवार थिए । 

घटनामा परेर गम्भिर घाइते भएकाहरु मध्ये ६ जनाको दुबईको अल रशिद हस्पिटलमा उपचार भइरहेको छ । बाँकीलाई शेख जायद सडकमा रहेको अल जहरा अस्पातल तथा दुबइ इन्भेस्टमेण्ट पार्क डिआइपीमा रहेको न्यू मेडिकल सेण्टरमा उपचार गराइदै छ । 

दुवईका ती अस्पतालमा उपचाररत नेपाली कामदारलाई भेट्न दूतावासको टोली गएको छ । टोलीमा दूतावासका द्वितीय सचिव कृष्ण अर्याल, श्रम सहचारी हिराकुमारी यादव लगायतका प्रतिनिधी हुनुहुन्छ । टोलीले ज्यान गुमाएका नेपालीको पूर्ण विवरण तथा घाइते नेपालीको अवस्थाबारे जानकारी लिने र कम्पनीसँग समन्वय गरेर सहयोगका लागि पहल गर्ने छ ।