Please Update Your Browser.

सरकारी चिकित्सकलाई स्वास्थ्यमन्त्रीको निर्देशनः निजी क्लिनिक नचलाइदिनुस्

धनुषा, भदौ ९। स्वास्थ्यमन्त्री गिरिराजमणि पोख्रेलले सरकारी अस्पतालमा कार्यरत चिकित्सकलाई निजी क्लिनिक सञ्चालन नगर्न निर्देशन दिएका छन् । जनकपुर अञ्चल अस्पतालको निरीक्षणमा आएका उनले चिकित्सक तथा व्यवस्थापन समितिका पदाधिकारीसँगको अन्तरक्रिया कार्यक्रममा यस्तो निर्देशन दिएक हुन् । यो कुरालाई निर्देशनको रुपमा नबुझेर राष्ट्रिय आवश्यकता ठान्न पनि उनले आग्रह गरे ।

जनकपुर अञ्चल अस्पतालबारे निकै गुनासो आएपछि स्वास्थ्यमन्त्री पोख्रेलले डा. रामपरीक्षण यादवलाई मेडिकल सुपरिटेन्डेन्ट (मेसु) बाट हटाइ दुई साताअघि मात्र नियुक्त गरेका मेसु डा. कल्पना बछारलाई लक्षित गर्दै भने,– “निजी क्लिनिक बन्द गर्ने कामको शुरुवात मेसुबाटै हुनुपर्दछ। आफै निजी क्लिनिक सञ्चालन गर्नेले अरुलाई निर्देशन दिनसक्दैन। त्यसैले मेसुले अबिलम्व निजी क्लिनिक बन्द गर्नुपर्दछ।”

बिरामीको अत्याधिक चाप रहने यस अस्पताल सुधार गर्नुपर्नेमा जोड दिंदै उनले अब हामीले क्षेत्रीय होइन, प्रान्तीय दृष्टिकोणले नीति बनाउनुपर्ने र यहाँ रहेका क्षेत्रीय प्रयोगशालालाई प्रान्तीय प्रयोगशालाको रुपमा विकसित गर्नुपर्ने धारणा व्यक्त गरे।

करिब दुई वर्षदेखि सञ्चालन हुननसकेको यस अस्पतालको आइसीयु सेवा शीघ्र सञ्चालन हुने बताउँदै उनले सरकारी अस्पताल र स्वास्थ्य केन्द्रको व्यवस्थापनमा संवेदनशील भएर काम गर्न कर्मचारीलाई निर्देशन दिए ।