Please Update Your Browser.

देशभर ८८ महिलाले दिए स्वतन्त्र उम्मेदवारी

काठमाडौं, २१ कात्तिक । प्रतिनिधिसभा र प्रदेशसभाको निर्वाचका लागि प्रत्यक्षतर्फ ८८ जना महिलाको स्वतन्त्र उम्मेदवारी परेको छ । निर्वाचन आयोगका अनुसार मंसिर १० र २१ गते दुई चरणमा हुन लागेको निर्वाचनका लागि ८८ जना महिलाले स्वतन्त्र उम्मेदवारी दिएका हुन् ।

पहिलो चरणको निर्वाचनका लागि प्रत्यक्षतर्फ ६ जना महिलाले स्वतन्त्र उम्मेदवारी दिएका छन् । प्रतिनिधि सभाका लागि रसुवामा २ जना र नुवाकोटबाट एक जनाले उम्मेदवारी दिएका छन् ।

त्यस्तै दोलखामा एक र नुवाकोटमा २ गरी ३ जनाले प्रदेशसभाका लागि स्वतन्त्र उम्मेदवारी दिएका छन् ।

दोस्रो चरणमा हुने निर्वाचनका लागि ८२ जनाले स्वतन्त्र उम्मेदवारी दिएका छन् । जसमा प्रतिनिधि सभामा ३५ र प्रदेश सभामा ४७ जना छन् । काठमाडांै जिल्लामा सबै भन्दा बढी महिलाले स्वतन्त्र उम्मेदवार दिनेका छन् ।

काठमाडौंमा प्रतिनिधिमा र प्रदेशसभाका लागि १८ जना महिला स्वतन्त्र उम्मेदवार छन् ।

यस्तै मोरङमा २, धनुषा ३, महोत्तरी १, सलार्ही ३, काठमाडौं ८, ललितपुर २,रौतहट ३, पर्सा २, चितवन १, गुल्मी ३, रुपन्देही १, कपिलवस्तु १, पर्वत १ कैलाली १, कञ्चनपुर १ र नवलपरासी १ गरी ३५ जनाले प्रतिनिधिसभाका लागि स्वतन्त्र उम्मेदवारी दिएका छन् ।

प्रदेशसभाका लागि झापा १, मोरङ १, सुनसरी १, सप्तरी १, सिरहा ४, महोत्तरी ४, सलार्ही २, काठमाडौं १०, भक्त्तपुर १, मकवानपुर १, रौतहट १, बारा ३, पर्सा ३,गुल्मी २ नवलपरासी बर्दघाट सुस्ता पूर्व १, मा १, रुपन्देशी १, कपिलवस्तु ६, बाँके १,बर्दिया १ र नवरपरासी ९बर्दघाट सुस्ता पश्चिम० २ गरी ४७ जनाले स्वतन्त्र उम्मेदवारी दिएका छन् ।

१९ महिलाको उम्मदवारी फिर्ता

दोस्रो चरणको निर्वाचनका लागि प्रत्यक्षतर्फ उमेदवारी दिएका मध्य १९ जना महिलाले उम्मेदवारी फिर्ता लिएका छन् ।

४५ जिल्लाका प्रतिनिधिसभातर्फ १ सय २८ र प्रदेशसभातर्फ २ सय ५६ निर्वाचन क्षेत्रका लागि कार्तिक १६ गते ४ हजार ७ सय ८ जनाको उम्मेदवारी परेको थियो ।

प्रतिनिधिसभातर्फ १ हजार ७ सय ४२ तथा प्रदेशसभातर्फ २ हजार ९ सय ६६ जनाको उम्मेदवारी दर्ता भएको आयोगले जनाएको छ ।

आयोगका अनुसार प्रतिनिधिसभातर्फ ८ र प्रदेशसभातर्फ ११ गरी १९ जना महिलाको उम्मेदवारी फिर्ता गरेका छन् ।

आयोगले आफ्नो वेव साइटमा राखेको दोस्रो चरणको प्रतिनिधि र प्रदेशसभा उम्मेदवारको अन्तिम नामावलीमा प्रतिनिधि सभा १ सय ३० र प्रदेश सभाका लागि २ सय २० गरी ३ सय ५० जना महिला चुनावी प्रतिष्प्रर्धामा छन् ।

जनसंख्याअनुसार महिलाको प्रतिनिधित्व कम भएको भन्दै अन्तर पार्टी महिला सञ्जालले संविधानको भावनाअनुसार आसन्न प्रतिनिधि सभा र प्रदेश सभा सदस्यको निर्वाचनमा प्रतिनिधित्व सुनिश्चित हुनुपर्ने मागसहित दबाबमूलक कार्यक्रम गर्दै आएको छ ।

सञ्जालले स्थानीय तहमा न्यूनतम ५० प्रतिशत, प्रदेश सभामा न्यूनतम ४० प्रतिशत र प्रतिनिधि सभामा न्यूनतम एक तिहाइ महिलाको प्रतिनिधित्व सुनिश्चित गर्न माग गदौ आएको सञ्जालका उपाध्यक्ष पुष्पा ठाकुरले बताईन् ।