Please Update Your Browser.

बोक्सी भन्दै आफ्नै छोराले आमालाई घरबाट निकाले

सिराहा । सिराहाको कर्जन्हा नगरपालिका–७ की ८० वर्षीया वृद्धा खजनीदेवी कारकलाई उनका परिवारले कथित बोक्सीको आरोप लगाई घरबाट निकाला गरेका छन् ।

पीडित वृद्धालाई उनका ६ भाइ छोरा, बुहारीहरूले कथित बोक्सी आरोप लगाएर एक वर्षदेखि घरबाट अलग झुपडी बनाई राखेका हुन् । १० वर्षअघि पतिको मृत्यू भएपछि छोराहरूले आमालाई पालैपालो आफ्नो घरमा राखेर पाल्दै आएका थिए ।

सौतापट्टीका जेठो छोरा ७० वर्षीय धर्मनाथ कारककी बुहारीको १० वर्ष अगाडि उपचारमा लग्ने क्रममा मृत्यु भएको थियो । धर्मनाथको पत्नीको मृत्यु, खजनीको आफ्नै ६० वर्षीय छोरा रामपुकार कारककी बुहारीको मृत्यू भएको थियो । अर्का छोरा ५६ वर्षीय शिवजी कारकको पत्नीलाई भुत लाग्ने गरेको र सबै घटना आमाकै कारण भएको भनेर नेपाल र भारतका नाम चलेका धामीहरूले भनेपछि गाउँमै छुट्टै झुपडी बनाई राखेको धर्मनाथ कारकले आरोप लगाए ।

पीडितलाई छोराहरूले आफ्नो घर, परिवारमा आउन दिँदैनन् भने कसैसँग बोल्न र कतै घुम्न पनि जान दिँदैनन् । पीडित बृद्धाले मर्ने उमेरमा छोरा, बुहारी नाति नातिनासँग बसेर गफ गर्ने रहर भएपनि परिवार र समाजले आफूलाई बहिष्कार गरेको हुनाले अधिकारकर्मीहरूसँग घरमै स्थापित गराइदिन आग्रह गरेकी छन् ।

घटनाको जानकारी पाएर इन्सेक र मानव अधिकार संरक्षण केन्द्र सञ्जालले जेठ २३ गते घटनाको बारेमा स्थलगत अनुगमन गरेका छन् । सञ्जालका संयोजक सुनिलकुमार साहले घटना अमानवीय भएकाले तुरून्त पीडितलाई परिवारमा स्थापित नगराए कारबाही प्रकृयाको लागि सञ्जालले पहल गर्ने बताए ।

इलाका प्रहरी कार्यालय मिर्चैयाका डिएसपी दिपक खड्काले घटनाको अनुसन्धान गरी आवश्यक कारबाही प्रकृया अगाडि बढाउने बताए ।