काठमाडौं । नेकपा (एमाले) अध्यक्ष केपी शर्मा ओलीले सुदूरपश्चिम प्रदेशका पार्टी सांसदहरूसँग करिब चार घण्टा लामो अन्तरक्रिया गरेका छन्। काठमाडौंस्थित गुण्डुमा भएको भेटघाटमा ११ जना प्रदेश सभा सदस्य सहभागी थिए।
प्रदेशमा संसदीय दलको नेतृत्व परिवर्तनको चर्चा चलिरहेका सन्दर्भमा भएको उक्त छलफलमा अध्यक्ष ओलीले संगठनात्मक एकता र समन्वयमा जोड दिएका छन्।
बुधबार बिहानका लागि तय गरिएको बैठक केही ढिलो गरी सुरु भएको थियो। प्रारम्भमा प्रदेश संयोजक गणेशसिंह ठगुन्नाले समग्र अवस्था प्रस्तुत गरेका थिए भने त्यसपछि प्रदेश अध्यक्ष कृष्णप्रसाद जैशीले थप विवरण राखेका थिए।
त्यसपछि पार्टीतर्फबाट दुई प्रतिनिधिले धारणा राखेपछि सांसदहरूले प्रदेश सरकारको कार्यसम्पादन, दलको आन्तरिक अवस्था तथा समसामयिक राजनीतिक विषयमा आफ्ना विचार अध्यक्ष ओलीसमक्ष राखेका थिए।
सुदूरपश्चिम प्रदेश सरकारमा कांग्रेस नेतृत्वको गठबन्धनमा एमालेका तर्फबाट तीन मन्त्री र एक राज्यमन्त्री सहभागी रहेका छन्। मन्त्री चयनमा समेटिन नसकेका केही सांसदहरूले अवसरको समुचित बाँडफाँट हुनुपर्ने विषय पनि उठाएका थिए।
सांसदहरूको धारणा सुनेपछि अध्यक्ष ओलीले पार्टीभित्र एकता कायम राख्नु आवश्यक रहेको बताउँदै समसामयिक राजनीतिक परिस्थितिमा संगठनलाई मजबुत बनाएर अघि बढ्नुपर्नेमा जोड दिएका थिए।
यद्यपि, बैठकमा नेतृत्व परिवर्तन वा मन्त्री सम्बन्धी कुनै औपचारिक निर्णय भने नभएको जनाइएको छ।
थप छलफलका लागि अध्यक्ष ओलीले उपमहासचिव लेखराज भट्ट, प्रदेश संयोजक गणेशसिंह ठगुन्ना, प्रदेश अध्यक्ष कृष्णप्रसाद जैशी र संसदीय दलका नेता राजेन्द्रसिंह रावललाई आगामी शुक्रबार पुनः छलफलका लागि बोलाएका छन्।
संसदीय दलका नेता रावलका अनुसार सांसदहरूले उठाएका गुनासा र सुझाव अध्यक्ष ओलीले ध्यानपूर्वक सुनेका छन् र सबैलाई एकताबद्ध भएर अघि बढ्न आग्रह गरेका छन्।
